НАТО го пресретна ирански балистички ракетен проектил насочен кон Турција, во она што претставува прва директна вмешаност на Алијансата во одбраната на земја-членка од ирански напади откако САД и Израел започнаа воено дејствување против Иран.

Ракетата го поминала воздушниот простор на Ирак и Сирија пред да биде уништена од системите за противракетна одбрана на НАТО распоредени во источниот Медитеран. Остатоците паднале во провинцијата Хатај на југот на Турција, без пријавени жртви.

Турското Министерство за одбрана потврди дека Анкара го задржува правото на одговор. „Го задржуваме правото на одговор на секое непријателско дејство против нашата земја. Ги предупредуваме сите страни да се воздржат од чекори кои можат да ја ескалираат регионалната криза”, соопшти министерството. Иран, пак, негираше дека лансирал ракета кон турскиот воздушен простор.

НАТО соопшти дека ги осудува иранските напади и цврсто застанува зад Турција и сите сојузници. По успешното пресретнување, Алијансата објави дека ги зајакнува своите противракетни капацитети во регионот. Турција е домаќин на клучни радарски системи на НАТО лоцирани на само 700 километри од иранската граница, што ја прави стратешки важна точка во тековниот регионален конфликт.

Инцидентот е прв случај на директна ирански напад врз турска територија и означува значајна ескалација на конфликтот, кој до сега однел повеќе од илјада животи. Регионалните сили внимателно ги следат реакциите на Анкара, бидејќи евентуален турски воен одговор може дополнително да ја прошири географијата на судирот.