Поради скандал со злоупотреба на деца, десетици илјади луѓе протестираа во Будимпешта

Десетици илјади луѓе синоќа протестираа во Будимпешта поради новообјавени информации за долгогодишен скандал со злоупотреба на деца во државни институции, јави ДПА.

Протестот беше организиран од опозициската Партија Тиса на лидерот Петер Маѓар, откако беше објавен владин извештај со над 3.000 случаи на злоупотреба во домови за згрижување. Извештајот бил завршен во 2021 година, но останал во тајност. Министерството за внатрешни работи го потврди неговото постоење.

Скандалот стана политички актуелен по оставката на претседателката Каталин Новак во февруари 2024 година, предизвикана од помилувањето на заменик-директор осуден за сексуална злоупотреба на деца.

Новите откритија, вклучувајќи и случаи на можен криминал во малолетнички затвор во Будимпешта, ја поттикнаа опозициската кампања на Партијата Тиса. Таа сега води во анкетите пред изборите закажани за април, според ДПА.