Среда попладне, 13:50 часот, улица Драчевска во Скопје. Гости излегувале од угостителски објект. Во тој момент, од возило во движење, 26-годишен скопјанец извадил пиштол и испукал неколку куршуми во воздух.

Полицијата интервенирала веднаш и го лишила од слобода осомничениот, означен со иницијалите Л.Р. Пиштолот му е одземен, а тој е задржан во полициска станица. По целосно документирање на случајот и во координација со јавниот обвинител, против него ќе биде поднесена кривична пријава по член 396 од Кривичниот законик.

Во соопштението на МВР нема податок дали има повредени лица или материјална штета.

„Во воздух” не е ублажувачка околност

Формулацијата што секогаш се појавува во ваквите соопштенија е „испукал во воздух”, и таа секогаш звучи како да го намалува тежината на делото. Не ја намалува. Куршум испукан нагоре не исчезнува – тој се враќа надолу, со брзина доволна да убие, и никој што пука во воздух не знае каде ќе слета.

Ова се случило среде ден, во град, пред луѓе што излегувале од кафеана. Не во празно поле, не ноќе, не на свадба во двор – на улица, среде попладне, покрај гости.

Тој што пукал го избрал тоа. Не бил испровоциран според ниту едно соопштение, не се бранел – извадил пиштол од кола во движење и стрелал додека покрај него минувале луѓе.

Полицијата, треба да се каже, реагирала брзо и го уапсила истиот ден, со одземено оружје. Тоа е делот од системот што функционирал.

Прашањето што останува не е за него, туку за пиштолот: колку вакви има во оптек, и колку од нив ќе се појават на улица следниот пат кога некому ќе му текне дека попладнето бара куршум.