Швајцарија донесе одлука да ги замрзне сите финансиски средства што во земјата ги поседуваат Николас Мадуро и лица поврзани со него, откако венецуелскиот лидер беше уапсен од американските сили во Каракас и префрлен во Соединетите Американски Држави, објави Ројтерс.

Како што соопшти Федералниот совет на Швајцарија, мерката стапува на сила веднаш и ќе важи во период од четири години. Целта е да се спречи одлив и прикривање на средства за кои постои сомнеж дека се стекнати на нелегален начин.

Од швајцарските власти информираат дека оваа одлука е дополнување на веќе постојните санкции кон Венецуела, кои беа воведени уште во 2018 година. Истовремено, беше нагласено дека замрзнувањето на средствата не се однесува на членовите на актуелната венецуелска влада.

Федералниот совет соопшти и дека Швајцарија ќе соработува со меѓународните партнери со цел враќање на сите нелегално стекнати средства, кои, како што наведуваат, треба да бидат вратени во корист на венецуелскиот народ.

Одлуката доаѓа во чувствителен момент, по апсењето на Мадуро и зголемените меѓународни притисоци за финансиска и правна одговорност на поранешниот венецуелски врв.