Пазарите на стоки се познати по својата цикличност и нагли ценовни осцилации, но среброто годинава се издвои како еден од најекстремните примери. Од почетокот на годината, цената на среброто порасна за повеќе од 110 проценти, а во декември за првпат во историјата надмина 60 долари за унца, што предизвика вистинска глобална „лудост“ за овој благороден метал.

Наглиот раст беше дополнително поттикнат откако американската администрација најави можност за повисоки царини за увезено сребро. Тоа резултираше со лавина од купувачки нарачки и масовен транспорт на сребро од Лондон кон Њујорк. Американскиот пазар COMEX моментално располага со трипати поголеми залихи од вообичаеното, што јасно укажува на сериозната нерамнотежа меѓу понудата и побарувачката.

Проблемот е уште поизразен ако се знае дека среброто најчесто не се ископува самостојно, туку како нуспроизвод при експлоатација на злато, бакар, цинк и олово. Поради тоа, производството не може брзо да одговори на нагло зголемената побарувачка. Рударските компании признаваат дека биле изненадени од интересот, особено од страна на малите инвеститори, кои масовно се свртеа кон среброто како подостапна алтернатива на златото.

Дополнителен импулс на растот дојде и од поскапувањето на златото, како и од одлуката на САД да ги вклучат златото и среброто на листата на критични минерали. За разлика од претходни кризи, овој раст не е директно поврзан со висока инфлација или финансиска катаклизма, што го прави феноменот уште поинтересен за аналитичарите и инвеститорите.