Британскиот премиер Кир Стармер јавно ги предупреди граѓаните дека иранскиот конфликт веќе се чувствува во британската економија – и дека ефектите ќе траат подолго отколку што се надева Лондон.

„Не паничете”, беше првата порака. Која во политичка комуникација значи точно спротивно – дека ситуацијата е сериозна. Стармер потврди дека владата работи „24 часа на ден” околу синџирите на снабдување, но додаде дека отворањето на Хормускиот теснец нема веднаш да ги поправи штетите.

„Луѓето ќе мора да ги променат своите навики – каде ќе одат на одмор, што ќе купуваат во маркети”, изјави Стармер на прес-конференција по итен состанок на кризниот комитет. Британија преоѓа во режим на штедење – на најкултурно место на оваа Европа.

Премиерот повтори дека Лондон нема да се вклучи во воени операции, но дека владата мора да ги штити граѓаните од последиците на конфликтот. „Мора да направиме сè за да го отвориме Хормускиот теснец”, рече тој. Реториката на „мора” е стандардна, но Стармер досега ретко зборуваше за алтернативни сценарија. Сега зборува.

За Балканот ова не е дистантна вест. Британија увезува нафта на меѓународниот пазар – истиот пазар од кој и Грција, Италија, и преку нив – Македонија ја плаќаат бензинската пумпа. Кога Лондон вели „менувајте навики”, тоа во кафаните на Скопје преведено значи: подгответе се бензинот да поскапи и тука.

Прашањето кое Стармер не го одговори е едноставно: ако Британија со своите резерви и нафтени партнери не може да обезбеди стабилност за летото, што може Балканот?