Странство не е бајка: Мицкоски тврди дека иднината е дома

Наместо заминување во странство, работа, живот и перспектива во Македонија. Премиерот Христијан Мицкоски денеска порача дека државата може и мора да биде место каде што граѓаните ќе живеат и ќе заработуваат без чувството дека се „дојденци“.

Како што истакна, Владата има јасна цел – да создаде подобри услови за живот и работа во земјата, за младите и за оние кои размислуваат за враќање од странство.

„Тука може да се живее и да се работи и заработи многу подобро отколку таму, каде што секогаш го имате чувството дека сте дојденци. Можеби звучи грубо, но тоа е реалноста. Сум бил, сум видел, сум имал можности, но чувството на припадност и љубов кон татковината ме врати назад“, рече Мицкоски.

Премиерот нагласи дека Македонија е заедничка татковина на сите нејзини граѓани, без оглед на етничката припадност, и дека таа порака мора јасно да се слушне.

Во своето обраќање, Мицкоски остро се осврна и на, како што рече, „нихилистички настроени групи“ кои создаваат токсична атмосфера и вршат притисок врз луѓето што сакаат нормален и пристоен живот во земјата.

„Постои талог во општеството на кој сè му смета – дури и фризурата на другиот. Таа токсичност создава притисок кој не секој може да го издржи, па луѓето велат: се пакувам и си одам. Не треба граѓаните да бидат жртви на таков бран негативизам“, порача премиерот.

Според него, ваквиот нихилизам често е присутен и во политиката, кај партии кои, како што рече, немаат реални политики, туку само порака дека „овде ништо не чини“.

Мицкоски нагласи дека Владата паралелно работи и на создавање услови за враќање на иселениците, како и на подобрување на квалитетот на живот во земјата, со цел Македонија да стане вистинска алтернатива за живот, а не само место од кое се заминува.