Доналд Трамп пораката ја испорача со типична самоувереност: „Земјите се вртат кон Америка, бидејќи нашата нафта е со подобар квалитет.” Изјавата дојде додека светските берзи реагираа на најавата дека Вашингтон е блиску до можен мировен договор со Иран – а нафтата веднаш падна.

Брент крудот падна за 1,5 проценти, на 108,18 долари за барел. Западнотексаски сорт – 1,6 проценти, на 100,60 долари. Минатата недела Брент беше на највисоко ниво од март 2022 година, односно на нивоа што нашиот регион не ги паметеше од почетокот на украинската криза.

Трамп истовремено најави дека ќе паузира делови од операцијата за безбеден транзит низ Ормускиот теснец, иако „американската морнарица ќе продолжи да ги блокира иранските пристаништа”. Двојна порака: преговараме, ама не отстапуваме.

Логиката на пазарот е едноставна. Ако напаѓаш танкери во Ормуз – нафтата се качува. Ако нудиш мир – нафтата паѓа. А секој потег на Трамп ги движи цените и за Македонија и за регионот, кои не учествуваат во ниту еден дел од таа геополитичка пресметка – но ги плаќаат сите последици на пумпите.

Аналитичарот од LSEG, Ен Фам, предупреди дека дури и при договор „целосното обновување на трговските текови ќе бара значително време”. Со други зборови – ако и утре потпишат, цените на пумпите кај нас уште долго нема да паднат.

А вистинскиот тест на „американската нафта со подобар квалитет”? Дали Балканот ќе ги почувствува тие „подобри цени”? Нашите пумпи имаат традиција – кога нафтата се качува на берзите, цените овде растат за две недели. Кога паѓа – паѓаат за два месеци. Ако воопшто паднат.

Трамп преговара. Иран претендира на победа. А Балканот пуми со 90 евра за полн резервоар.