ВМРО-ДПМНЕ го обвини СДСМ и лидерот Венко Филипче дека без аргументи создаваат страв и паника во јавноста околу можната изградба на дата-центри во Македонија. Пораката од владејачката партија е дека на земјава ѝ треба развој и визија, а не она што тие го нарекуваат политичка хистерија.

„Филипче повторно излезе јавно со категорични ставови за евентуалната изградба на дата-центри во Македонија, како неговото мислење само по себе да е доволен аргумент“, велат од ВМРО-ДПМНЕ. Партијата тврди и дека опозицијата дополнително е изнервирана затоа што иницијативата против дата-центрите во Пехчево не поминала, бидејќи зад неа стоел нивен човек.

Тука соопштението почнува да се самопобива. Иницијативата во Пехчево не само што „помина“ – Советот на Општина Пехчево на 25 август едногласно ја отфрли иницијативата за отпочнување постапка за дата-центар во атарот на Панчарево. Едногласно. Ако одлуката била партиска операција, тогаш и советниците на самата ВМРО-ДПМНЕ гласале за неа.

Барањето факти оди во двете насоки

Од владејачката партија бараат факти, стручни анализи и аргументирана дебата наместо страв. Тоа е сосема легитимно барање – и точно тоа беше барањето во Пехчево.

Дата-центарот бара голема приклучна моќност и стабилно снабдување со струја, во држава која увезува електрична енергија. Бара вода за ладење, при што количината зависи од големината на објектот, густината на опремата и избраниот систем. Бара земјиште, оптички траси, безбедност. Досега ниту едно соопштение не кажа колку струја и колку вода, ниту по која цена. Кога тие бројки ги нема, барањето „дајте факти“ доаѓа од страната која ги држи фактите.

Со паника ништо не се гради – тоа е точно. Но не се гради ниту со соопштенија. Ако инвестицијата е добра како што се тврди, најбрзиот начин да се исмее противникот не е да се напише дека шири хистерија, туку да се објават бројките и да се остави тие да зборуваат.

Пехчево постави прашање и доби напад врз опозицијата. Одговорот на прашањето сè уште го нема.