Американската армија конечно го исклучи рекламното следење на телефоните и компјутерите што им ги дава на своите војници. Не поради приватноста. Поради тоа што непријателски држави веќе ги користеле тие податоци за да ги најдат американските војници на терен.

Во писмо испратено до сенаторот Рон Вајден, потврдено е дека копнената војска, воздухопловството, морнарицата, маринците и Командата за специјални операции го исклучиле рекламниот идентификатор на сите службени уреди – iPhone, Android телефони и Windows компјутери низ целата воена мрежа. Воздухопловството го направило тоа последно, дури во јули.

Механизмот е поедноставен отколку што звучи. Секој телефон носи рекламен идентификатор што апликациите го читаат и го испраќаат натаму. Локациските податоци од тие апликации редовно завршуваат кај трети фирми и кај брокери со податоци, кои потоа истите ги продаваат на отворен пазар. Кога идентификаторот е исклучен, локацијата на тој војник се стопува во морето од сите други исклучени уреди – тешко е да се извлече конкретен човек од купот.

Вајден го отвори прашањето порано годинава, откако утврди дека странски противници ги гаѓале американските војници на Блискиот Исток користејќи комерцијално купени локациски податоци. Не хакирање, не пресретнување сигнали – купување. Истиот пазар на кој секој оглашувач може да плати за да дознае кој каде се движи.

Тука е делот што ретко се кажува гласно. Додека армијата го затвора овој канал за своите луѓе, американските разузнавачки служби и ФБИ отворено признаваат дека ги купуваат истите податоци за надзор и разузнавање – без судски налог. Значи проблемот не е дека податоците постојат. Проблемот е кој ги купува. Кога ги купува противникот, тоа е закана што бара итна мерка на ниво на цела војска. Кога ги купува сопствената служба, тоа е работен метод.

Вајден и по промената предупреди дека приватните телефони на војниците и на надворешните соработници што влегуваат во базите остануваат отворена врата. Службениот уред е заштитен, човекот што го носи во џебот не е.

Вреди да се забележи што точно беше решението. Не нов закон, не забрана за брокерите, не казна за некого – туку исклучување на едно поле во поставките на службените телефони. Значи целиот тој пазар останува каков што беше. Од него излегоа само уредите на американските војници.