Nvidia веќе вложи 40 милијарди долари во AI компании во првите неколку месеци на 2026. Толкава сума е поголема од годишниот буџет на половина балкански држави. И поголемиот дел оди во компании кои се… купувачи на самата Nvidia.

Од вкупната сума, 30 милијарди долари се за OpenAI. Само таа една инвестиција сама по себе би била историски настан – сега е само ставка во портфолиото на еден чип-производител. Дополнително, седум мулти-милијардерски инвестиции во јавно тргувани компании, последните: до 3,2 милијарди долари во производителот на стакло Corning и 2,1 милијарди долари во операторот на дата центар IREN.

Според податоци на FactSet, Nvidia учествувала во околу 24 круга на финансирање во приватни стартапи во 2026, по 67 такви во 2025. Тоа значи дека секоја недела од оваа година потпишала договор со некој AI стартап. Притоа – сите тие компании ќе купуваат чипови од Nvidia за да градат сѐ што продаваат.

Аналитичарот на Wedbush Securities, Метју Брајсон, ова го нарекува „кружна инвестициска тема” – пари што кружат меѓу истите играчи. Компанијата A инвестира во компанија B, која после со тие пари купува производи од компанија A. Изгледа како раст. Изгледа како здрав пазар. Но реално, тоа е иста сума која постојано се пребројува. Брајсон додава дека ако работи, ова може да биде „конкурентен ров” за Nvidia.

Кружни деловни шеми не се новина – тие беа симптом и пред пукањето на дот-ком меурот во 2000. Но тогаш сумите беа во милиони, не во милијарди. И тогаш не постоеше една единствена компанија која контролираше 90% од хардверот без кој никој од играчите не може да функционира. Прашањето кое економистите шепотат, а аналитичарите гласно отфрлаат: што ќе се случи кога ќе застане музиката?