Сликата ја знае целиот интернет: кученце што седи во запалена соба и мирно вели „ова е во ред”. Мемот „This is fine” на илустраторот Кеј Си Грин стана симбол на тоа како се прави дека сè е нормално додека наоколу гори. Овој пат, сепак, она што гореше беше самото авторско право – бидејќи ВИ-стартапот Artisan го искористи токму тоа кученце во своите реклами, без да праша никого.

Рекламите се појавија на автобуси и метро во Њујорк и Сан Франциско. На нив, познатото куче седи среде пламен, а покрај него стои текст: „Мојот канал гори” и „Вработи ја Ава, ВИ-агентот”. Пораката е јасна – наместо човек, користи ја нашата вештачка интелигенција. Иронијата дека компанија за ВИ украла туѓа уметност за да продаде ВИ очигледно ѝ промакна на самата компанија.

Грин не молчеше. Јавно изјави дека неговата уметност е „украдена онака како што ВИ краде” и ги повика следбениците да ги „вандализираат” рекламите. Се пожали и на нешто што секој независен автор го знае: наместо да работи на она што го сака, мора да троши време и енергија на правни битки против некој со многу повеќе пари.

На крајот спогодбата дојде брзо. Artisan се согласи да ги повлече рекламите со ликот на Грин од двата града, а Грин ја тргна својата критична објава. „Постигнавме спогодба прилично брзо”, потврди авторот. Од компанијата, чиј основач и извршен директор е Џаспар Кармајкл-Џек, претходно тврдеа дека имаат „голема почит кон Грин и неговото дело” – почит која, се чини, ја откриле дури откако ликот веќе висеше по автобусите.

Случајот е мал, но кажува нешто поголемо. Додека ВИ-индустријата зборува за креативност и иднина, во пракса честопати само зема готово туѓо дело и го пакува како свое. Прашањето што останува не е дали Грин ќе си ги добие рекламите симнати – тоа веќе се случи – туку колку автори немаат ниту време ниту пари да се борат, и колку „This is fine” реклами поминуваат незабележано.