Вицепремиер кој со месеци не доаѓаше на работа, се сликаше во егзотични дестинации, а Владата криеше дали сè уште зема плата – конечно сам си поднесе оставка. Арбен Фетаи, потпретседателот на Владата за добро владеење, замина од функцијата „со крената глава и чиста совест”. Иронијата дека токму ресорот за „добро владеење” ваква приказна ја произведе, тешко може да биде поголема.

Фетаи ја објави оставката на социјалните мрежи, со пораки за реформи, отчетност и транспарентност. „Имав чест и привилегија да ѝ служам на државата… мисија која е исто толку важна колку што е и неблагодарна”, напиша, додавајќи дека не е целосно задоволен од постигнатото, но дека работел да постави „здрави темели”.

Проблемот е во тоа што јавноста со месеци поставуваше сосема други прашања – и не доби одговор на ниедно. Каде е Фетаи? Дали е во Македонија или во Брисел, од каде што дојде? Дали сè уште зема плата иако со месеци го нема на работа? Премиерот Мицкоски молчеше. Молчеше и потпретседателот на Собранието Антонио Милошоски кога од него се побара вицепремиерот да се појави на седница за пратенички прашања.

Сцената во Собранието беше речита: пратеничката на СДСМ Даниела Николова побара да се обезбеди присуството на Фетаи, а Милошоски – не знаеше што да одговори. Можеби затоа што единствениот достапен одговор беше непријатен: според самиот премиер, Фетаи му рекол дека не се гледа како дел од владата што тој ја предводи. Човек со таа позиција седеше во фотелја на вицепремиер со месеци.

Сега, кога Мицкоски и онака најавува реконструкција на владата во јуни, Фетаи го направи првиот потег сам. Прашањето што останува не е за неговата „крената глава” – туку за сите месеци во кои една функција постоеше само на хартија, додека плаќа, простории и место во владата стоеја резервирани за некој што едноставно не доаѓаше. Кој ја плати таа сметка, и зошто требаше толку долго за да се констатира очигледното?