Две лица се повредени во тешка сообраќајна несреќа што се случи вечерва околу 19:40 часот на булеварот „Партизански одреди“ во Скопје, потврдија од Министерството за внатрешни работи.

Според информациите, во судирот учествувале четири патнички возила – „Голф“, „БМВ“, „Мерцедес“ и „Цитроен“. Повредените лица се пренесени во Клиничкиот центар „Мајка Тереза“ и во ГОБ „Св. Наум Охридски“, каде им се укажува лекарска помош.

Инцидентот се случил во близина на местото каде што пред неколку месеци трагично загина младата Фросина Кулакова, што дополнително ја вознемири јавноста. Причините за судирот сè уште се утврдуваат, а полициски екипи извршиле увид на местото на несреќата. Сообраќајот бил привремено блокиран.

По несреќата, сестрата на Фросина, Росица Кулакова, објави емотивна порака на социјалните мрежи:

„На истото место каде што пред нецела година ја убија сестра ми… се вози со 80, 90 километри како ништо да не се случило. Јас гледам сè тоа од прозор, секој ден поминувам од тој проклет пешачки премин каде што Фросина згасна засекогаш. Ни трагедија, ни гроб, ни свеќа не ја разбудија свеста. Полицијата е фантом, а Партизанска станува писта на смртта. Треба ли пак некој да загине за да светне ламбата? Ако не е законски да се постават лежечки полицајци – смени го законот!“

Нејзиниот апел повторно ја отвори дебатата за безбедноста на булеварот „Партизански одреди“, кој во последните години се вбројува меѓу најопасните сообраќајни делници во главниот град.

Граѓаните бараат итни мерки – лежечки полицајци, поголема полициска контрола и строги казни за несовесните возачи кои го претвораат булеварот во тркачка патека.