Основното јавно обвинителство Скопје ја проширува истрагата за проблемот со несобирањето на отпадот во главниот град, откако Скопје повторно се најде затрупано во смет. Од Обвинителството за „Скопје1“ потврдија дека проверките нема да бидат ограничени само на ЈП „Комунална хигиена“, туку можат да опфатат и други институции со надлежност во оваа област.

„Наредбите за проверки се однесуваат на сите институции што имаат надлежност. Во прв момент тоа е ЈП Комунална хигиена, меѓутоа не е исклучено да бидат опфатени и други органи“, велат од Обвинителството. Ова значи дека под лупа може да се најде и Град Скопје, со кој раководи градоначалничката Данела Арсовска, како основач на претпријатието.

Јавниот обвинител веќе издал наредби до МВР и други надлежни органи за итно постапување и проверки, а побарани се и вонредни инспекциски надзори од комуналните инспекциски служби за да се утврди моменталната состојба со собирањето и транспортирањето на отпадот.

Со ова, случајот влегува во поширока фаза на истрага, во која ќе се испитува дали постојат пропусти во работењето на ЈП „Комунална хигиена“, како и евентуална одговорност кај Град Скопје. Дополнително, ќе се утврдува дали има основи за кривична одговорност поврзана со управувањето со отпадот во главниот град.