Европската Унија повторно ги заострува правилата, а македонските превозници ќе мора да се прилагодат – или да останат пред граница. Од 1 јули, нова регулатива бара дури и дел од лесните комерцијални возила да имаат паметни тахографи за да можат да влезат во ЕУ.

Обврската се проширува на лесни комерцијални возила и комбиња со дозволена маса меѓу 2,5 и 3,5 тони, вклучувајќи ги и приколките, кога вршат меѓународен транспорт. Паметните уреди (од типот G2V2) автоматски ги бележат поминувањата на границите и транзитните точки, со што под поголема контрола се става работното време на возачите.

За големите транспортни компании ова не е новост – тие веќе работат по строги ЕУ стандарди. Но за помалите превозници и комбиња, кои досега минуваа под прагот, новото правило значи дополнителен трошок за опрема и адаптација. Кој ќе го плати тоа? Како и обично, на крајот – корисникот, преку цената на услугата.

Поентата на ЕУ е легитимна: контрола на работното време значи побезбедни патишта и помалку изморени возачи зад воланот. Но за земја што не е членка, секое ново правило од Брисел е порака дека пристапот до европскиот пазар се плаќа со постојано прилагодување. Македонските превозници немаат избор – или паметен тахограф, или нема меѓународен транспорт.