Tesla плати да го затвори спорот за смртоносна несреќа: но „самостојното возење“ сè уште не препознава сонце во очите

Tesla постигна спогодба во судски спор поврзан со смртоносна несреќа од 2023 година, во која возило користело напреден систем за помош при возење познат како Full Self-Driving (FSD). Условите на спогодбата не беа обелоденети. Тужбата ја поднесе ќерката на Џона Стори, 71-годишна жена која загина откако излегла од своето возило за да го регулира сообраќајот околу претходна несреќа предизвикана од заслепување од сонцето – и била удрена од Tesla Model Y.

Спогодбата го затвора семејниот спор, но не и поголемиот проблем за Tesla. Американската агенција за безбедност во сообраќајот (NHTSA) отвори истрага за FSD софтверот уште во 2024 година, по четири пријавени несреќи во услови на слаба видливост – меѓу нив и онаа со Стори. Во март 2026 истрагата беше надградена во инженерска анализа, во која агенцијата напиша дека системот „не успева да открие и да го предупреди возачот соодветно во услови на намалена видливост” – заслепување, магла, прашина.

Тоа не е сè. Федералната агенција отвори и втора истрага во октомври 2025, по пријави дека софтверот ги тера возилата да поминуваат на црвено светло или да се движат во погрешна лента. Што е на коцка? Меѓу можните исходи е и повлекување на возила од пазарот.

Спогодбата без објавени услови е класичен потег – се плаќа за да се затвори приказната пред да стигне до судница и пред бројките да станат јавни. Но додека едно семејство добива тивок крај, прашањето за безбедноста на системот што Tesla го продава како „самостојно возење” останува отворено пред регулаторите. Технологијата што ветува иднина без возач сè уште не може да препознае сонце во очите – а тоа е разлика што се мери во човечки животи.