Тениската легенда Новак Ѓоковиќ доби нова работа – глобален стратешки советник на приватниот инвестициски фонд General Atlantic. Според соопштението, тој ќе работи блиску со раководството, со компаниите во портфолиото и со инвеститорите, носејќи „перспективи за лидерство, отпорност и иновација”. Преведено од корпоративен на човечки јазик: фондот сака неговото име, неговата мрежа и неговиот пристап до светот на здравјето и добросостојбата.

И вестата доаѓа само неколку дена пред Ѓоковиќ да заигра на Вимблдон, со поглед кон 25-та Гренд слем титула. Партнерството, всушност, има логика. Ѓоковиќ веќе вложил во неколку компании за здравје и добросостојба – во Waterdrop во 2023, ја основал сопствената фирма за суплементи SILA во 2024, па компанијата за здрава храна Cob Foods во 2025, а поддржал и носливи уреди. Човекот одамна не е само тенисер; тој е бренд со портфолио.

За General Atlantic сметката е двојна. Преку Ѓоковиќ сакаат влез во секторот на здравје и добросостојба, но и поголемо присуство во спортските инвестиции – во последниве две години фондот веќе зеде удели во фудбалски клуб, спортски стадион и спортска медиумска агенција. Приватниот капитал сè подлабоко влегува во тенисот, а извршниот директор на фондот вели дека Ѓоковиќ има „силни ставови за тоа како професионалниот тенис може да се преобликува”. Кога играч од Балканот седнува на масата каде се одлучува иднината на сопствениот спорт, тоа е поинтересно од која било негова титула – затоа што таму моќта останува и кога рекетот ќе се спушти.