Додека Европа гори под рекордни горештини, во седиштето на Европската комисија во Брисел се случи нешто што еден службеник го нарече со една единствена збор: „феудализам”. Во петокот, климата на пониските катови на зградата „Берлемон” беше насилно исклучена за да се справат со кризата – додека катовите каде што седат Урсула фон дер Лајен и 26-те комесари останаа разладени.

Вработените добиле итна СМС-порака околу пладне: поради екстремните временски услови, климатизацијата на катовите од 1 до 7 се исклучува до крајот на денот. Зградата има 13 ката и околу 3.000 вработени. Оние горе дишеле ладен воздух; оние долу се потеле на работа во едни од најмоќните канцеларии на континентот.

Реакциите не задоцниле. Еден службеник за европски медиуми рече дека аранжманот личи на „феудализам”, друг го нарече „срамен”. Вработен на осмиот кат се пожали дека и со клима собата достигнала 25,7 степени – значи и привилегираните не биле баш во рај, но разликата со долните катови била очигледна. Институцијата претходно им препорача на вработените да избегнуваат најтопли часови, да пијат вода и да доаѓаат порано – совет што особено ги изнервира оние во неклиматизираните згради.

Зад анегдотата стои поголема слика. Само околу една петтина од европските домаќинства имаат клима, бидејќи зградите со децении се граделе да задржуваат топлина во зима, не да ладат во лето. Балканецот добро ја знае таа реалност – и кај нас климата е луксуз, а не стандард. Сликата на врвот што се лади додека дното се поти не е само бриселска; таа е препознатлива насекаде каде моќта седи на повисок кат. Прашањето е само кој ја плаќа сметката кога ќе стане жешко – буквално и преносно.