Земјата што извезува нафта до половина свет одеднаш нема доволно бензин за сопствените возачи. Директорот на Роснефт, најголемата руска нафтена компанија, Игор Сечин, му напиша писмо на Путин во кое штетата ја опишува како „невидена“. А кога шефот на нафтениот гигант паничи на хартија, работата веројатно е полоша отколку што кажуваат телевизиите.

Причината е украинската дрон-кампања што со месеци ги гаѓа руските рафинерии. Само во мај, 16 дрон-удари погодија 8 од 10-те најголеми руски погони. Аналитичарите проценуваат дека над 25 отсто од вкупниот руски капацитет за преработка на нафта е испаднат од строј. Резултатот се гледа на пумпите: во Иркутск, оддалечен 4.800 километри од Украина, возачите чекаа 18 часа да наточат гориво, а во Краснодарскиот регион се затвори најмалку третина од бензинските станици.

Сечин бара драстични мерки – да се укине задолжителната продажба на гориво преку берза, да се дозволи послаб „Евро-3“ бензин, дури и увоз на странско гориво. Замислете апсурдот: Русија, една од најголемите нафтени сили во светот, увезува бензин од Индија и забрани извоз на сопствениот. Путин официјално го призна проблемот, но украинските напади ги нарече „некритични“ – формулација што звучи повеќе како порака до јавноста отколку како проценка на состојбата.

Оваа приказна е поинтересна отколку што изгледа на прв поглед. Долго време сликата беше дека војната се води само на украинска територија, далеку од руското секојдневие. Но кога човек чека 18 часа за резервоар гориво, војната престанува да биде вест од фронтот и станува дупка во сопствениот ден. Ниту една сила не е толку голема што не може да ја почувствува војната дома – прашање е само колку долго ќе трае додека тоа стане премногу за да се нарече „некритично“.