Netflix размислува за телевизиски канали што работат 24 часа – враќање на точно она од што сите бегавме

Netflix, платформата што со години нè учеше да гледаме што сакаме и кога сакаме, сега размислува за нешто што звучи како чекор наназад во времето – телевизиски канали што работат непрекинато, 24 часа на ден, каде само го палиш и оставаш да си врви.

Плановите ги објави Wall Street Journal. Идејата е да се врати навиката на постојано вклучен телевизор во позадина – токму спротивното од моделот на „биндж” гледање што Netflix го популаризираше. Netflix засега не даде официјален коментар.

Зошто гигантот на стриминг би се вратил на класичен ТВ формат? Одговорот е во бројките и во рекламите. Уделот на Netflix во вкупното ТВ-гледање во април паднал на 7,8 проценти, а знаците на опаѓање на активноста ги тераат да бараат начини да ги задржат гледачите подолго. Тука доаѓа вториот, поважен мотив: во живо содржина значи реклами што не можеш да ги прескокнеш. За рекламниот бизнис на Netflix, тоа е злато.

Ова не е единствениот експеримент. Компанијата веќе тестираше кратки видеа, видео-подкасти и посебна апликација за игри за деца, а наводно преговара и за купување на Letterboxd – социјалната мрежа за љубителите на филм. Се разгледуваат и пакети со други сервиси, слично на она што го нудат Apple и Amazon.

Приказната кажува нешто пошироко за целата индустрија. Стримингот вети слобода од телевизиската програма и од рекламите, а сега токму тие стриминг гиганти полека ги враќаат обете. Кога „иднината на телевизијата” почнува да личи сè повеќе на телевизијата од која сите бегавме, вреди да се праша – што точно се промени, освен тоа кому му ги плаќаме парите?