Руска фрегата отвори оган со артилерија на околу 74 километри јужно од Плимут, каде се наоѓа Девонпорт – една од главните бази на британската кралска морнарица. Наслов за трепет. Но кога ќе се извади реториката, останува нешто многу поладнокрвно: најавена вежба во меѓународни води, што ја потврдија и двете страни.

Фрегатата „Неустрашими” изведе гаѓање со боево полнење во каналот Ла Манш. Британскиот патролен брод „Тајн”, кој ја следеше руската фрегата, се оддалечи пред почетокот на гаѓањето. И тоа не случајно – руската екипа претходно ги известила Британците преку радио за планираната вежба и побарала да се повлечат на безбедно растојание. „Тајн” се повлече, но продолжи да набљудува, а француски воен авион беше испратен над зоната, чија екипа побара појаснување за намерите на рускиот брод, пренесува Би-Би-Си.

Маневрите се одвиваа во меѓународни води и траеја околу 30 минути. Според британски извори, фрегатата користела бродски топ од 100 милиметри, но точниот број гранати и целта на вежбата не беа откриени. Британското Министерство за одбрана го потврди настанот: „Кралската морнарица ја набљудуваше вежбата од почеток до крај и продолжува внимателно да ги следи активностите на пловилото, подготвена да ја штити националната безбедност.”

Портпаролот на Кремљ, Дмитриј Песков, ги отфрли тврдењата дека Русија прекршила меѓународни протоколи – вежбата, вели, се одвивала во меѓународни води, со претходна најава до блиските пловила. И тука е целиот трик на ваквите вести: настанот е реален, деталите се точни, но тонот е скроен така што рутинска (иако намерно провокативна) поморска вежба да звучи како почеток на војна. Разликата помеѓу „руски брод пука во меѓународни води” и „Русија напаѓа” ја прави токму насловот – а не фактите под него.