Човекот што ја создаде Uber, а потоа беше избркан од сопствената компанија по низа скандали, повторно собра сериозни пари. Овојпат не за апликација што ги вози луѓето, туку за роботи што треба да ја преземат тешката индустрија.

Компанијата на Тревис Каланик, наречена Atoms, собра 1,7 милијарди долари во круг предводен од Andreessen Horowitz (a16z), еден од најголемите инвеститори во Силиконската долина. Во играта се и Bain Capital, Fifth Wall и – иронично – самиот Uber, компанијата што некогаш го исфрли Каланик од раководството.

Што прави Atoms? Компанијата спојува повеќе делови: „духови кујни” (ресторани без сала за гости, само за достава), автоматизација на возила во тешката индустрија преку купената фирма Pronto, а Каланик најавува влез и во рударството и градење на, како што вели, „подлога за роботи”. Со други зборови – сака софтвер и машини да ги преземат работите што досега ги правеа луѓе со раце и лопати.

„Пред шеснаесет години започнав пат да го дигитализирам физичкиот свет. Да го разберам, предвидам и контролирам физичкиот свет со софтвер”, изјави Каланик. Реченицата звучи амбициозно, но вреди да се потсетиме – истиот тој „дигитализиран физички свет” во случајот на Uber значеше илјадници возачи без договор, без осигурување и без гаранција за плата. Прашањето што никој на конференцискиот повик не го постави: кога роботите ќе ги преземат работите, каде одат луѓето што ги работеле?

Бен Хоровиц од a16z го објасни влогот со комплимент за Каланик: „Треба редок вид претприемач за да ги смени овие старомодни, тешки делови од економијата. Им треба цврста работна етика, енергија и опсег што опфаќа повеќе области.” Преведено од јазикот на инвеститорите: ние веруваме дека овој човек ќе ги притисне границите таму каде други не смеат.

1,7 милијарди долари е огромна сума за фирма што сè уште гради визија, а не готов производ. Но токму тоа е шемата на денешната ВИ и роботика – парите доаѓаат пред резултатите, врз основа на името на основачот и ветувањето. Каланик едно нешто веќе го докажа со Uber: знае да изгради нешто масивно и да го наруши постоечкиот поредок. Дали тоа е добро или лошо, зависи од која страна на нарушувањето стоиш.