Драма во воздухот над балканот: Пилот се онесвести, копилотот го спасил авионот

Летот на авиокомпанијата „Рајанер“ од Бергамо, Италија до Клуж, Романија можеше да заврши со трагедија, откако еден од пилотите ја изгубил свеста непосредно пред слетувањето. Неговиот колега, копилотот, морал итно да ја преземе контролата врз авионот и успеал успешно да го приземји на аеродромот во Клуж, објави „Телеграф.рс“.

Инцидентот се случил на летот FR-2682, кој во четвртокот превезувал патници од Бергамо кон Клуж. Според извештаите, пилотот се онесвестил во пилотската кабина само неколку минути пред слетувањето, што предизвикало паника меѓу екипажот. Првично, контролната кула во Клуж добила сигнал „пан-пан“, што означува дека пилотот не се чувствува добро, но ситуацијата сè уште не претставува непосредна закана за безбедноста на летот. Меѓутоа, кога состојбата на пилотот нагло се влошила и тој ја изгубил свеста, копилотот испратил итен сигнал „мајдеј“ до контролата на летови.

Благодарение на неговата присебност и професионалност, копилотот успеал да го спушти авионот безбедно. Пистата 25 на аеродромот во Клуж веднаш била испразнета, а спасувачките служби биле подготвени за итна интервенција. Веднаш по слетувањето, амбулантно возило се погрижило за пилотот, кој во тој момент сè уште бил во несвест и бил пренесен во болница.

Портпаролот на аеродромот изјави дека интервенцијата била извршена „брзо и професионално“ и дека безбедноста на патниците во ниту еден момент не била загрозена. „Благодарение на смиреноста на капетанот и подготвеноста на спасувачките служби, немаше опасност за патниците“, изјави тој.

Поради инцидентот, заменска пилотска екипа морала да пристигне од Букурешт, што предизвикало доцнење од околу три часа на повратниот лет кон Италија. Иако ситуацијата беше критична, инцидентот заврши без повредени патници, а реакцијата на екипажот беше пофалена како пример на професионализам и присебност во итни услови.