Од 1 септември на скопскиот аеродром едно исто возило ќе може бесплатно да застане во зоната „Hug & Fly“ пред терминалот само еднаш во рок од 24 часа. Десетминутниот бесплатен престој останува, но само – еднаш дневно, по регистарска табличка.

Од „ТАВ Македонија“ објаснуваат дека системот работи со автоматско препознавање и регистрирање на регистарските таблички, а целта е да се спречи злоупотребата на зоната, да се намали метежот пред самиот влез и да се обезбеди непречен проток на возила, особено во врвот на патничката сезона.

Возачите на кои им треба подолго задржување или повеќекратни доаѓања во текот на денот се упатуваат на главниот паркинг, кој има 1.200 места за автомобили и шест за автобуси. Краткорочното паркирање чини од 100 денари за под еден час до 1.000 денари за престој од осум до 24 часа.

Таксистите го гледаат тоа поинаку

Здружението на таксисти се спротивстави на мерката. Нивниот аргумент е директен: возач кој прави повеќе трансфери во ист ден го користи истото возило, значи со новото правило плаќа паркинг од втората возење натаму. Таксистите предупредуваат дека тоа ќе се пресели во цената на превозот, особено кај патниците со попреченост, за кои приближувањето до терминалот не е удобност туку потреба.

Нивното барање не е неограничен паркинг: „Бараме разумни решенија – строго почитување на максималното време на застанување, повеќекратни краткотрајни влезови во текот на денот и, ако треба, разумен минимален интервал меѓу бесплатните влезови.“

Здружението побара и Комисијата за заштита на конкуренцијата да провери дали различните услови за пристап создаваат нерамноправна конкурентска предност.

Едно правило, две различни ситуации

Мерката има логика ако проблемот се возила што престојуваат во зона за застанување подолго од дозволеното. Но правилото „еднаш во 24 часа“ не прави разлика меѓу тој што ја паркирал колата за 40 минути и тој што фрлил патник за три минути и веднаш продолжил.

Автоматското препознавање на таблички може да ги брои и минутите, не само влезовите. Прашањето е зошто ограничувањето е поставено на бројот на доаѓања наместо на времето поминато во зоната – бидејќи тоа е точката каде мерка за проток се претвора во дополнителен трошок за оние кои работат на аеродромот секој ден.