Градоначалник што се извинува на своите сограѓани не е честа сцена во Македонија. Максим Димитриевски го направи тоа во Куманово, на примопредавање на пет нови комунални возила: „Сакам да се извинам во мое лично име и во име на директорот на јавното претпријатие за нередовното сервисирање на сметот во градот на сите граѓани, особено во приградските населби, поради зачестените дефекти и технички проблеми со возилата коишто ги имаме на располагање.“

Тој очекува проблемот со собирањето на ѓубрето да биде надминат до крајот на годината. Извинувањето беше директно и без ограда – нешто што кумановци го чекаа подолго отколку што траеја дефектите.

Што точно пристигна

Возилата ги предаде министерот за транспорт Александар Николоски: две мултифункционални возила за одржување хигиена, еден камион-прскалка кој ќе овозможи миење на улиците и носење техничка вода при прекини во водоснабдувањето, и две возила за метење улици. Николоски посочи дека по Скопје, Куманово добива најмногу возила бидејќи е најголема општина на територијата на државата.

Петте возила се дел од набавка на вкупно 49 комунални возила што Министерството за транспорт ја направи со поддршка од Светската банка, распоредени во Скопје, Куманово, Тетово, Прилеп, Струмица, Штип, Охрид, Неготино, Кичево, Дебар и Велес. Според Министерството, набавени се со заштедени средства.

Николоски ги наведе и бројките за поддршка на општините: околу 242 милиони денари во првиот повик и околу 328 милиони во вториот, плус околу еден милион евра преку буџетот на Министерството за транспорт за изградба на мост, реконструкција на градската капела и локални улици. Најави и електрични автобуси за Куманово во следниот период.

Кај завршува донацијата, а каде почнува системот

Димитриевски вели дека јавното претпријатие со децении се соочува со финансиски проблеми. Тука лежи и цимката во целата приказна. Пет возила решаваат доцнење. Не решаваат зошто едно комунално претпријатие во градот со најголема територија во државата со децении нема капацитет да се обнови самото.

Општината најавува и нов јавен повик за избор на приватен партнер за организација на јавниот превоз на повеќе од 28 линии во градот. Тоа е втор систем што бара надворешна интервенција за да функционира.

Ѓубрето во Куманово веројатно ќе се крева поредовно оваа зима. Прашањето е што ќе се случи кога овие пет возила ќе ја навршат својата возраст – дали до тогаш претпријатието ќе биде во состојба само да ги замени, или градоначалникот повторно ќе стои на плоштадот и ќе се извинува.