Илјадници луѓе во понеделник тргнаа заедно со студентите низ центарот на Белград – од Ректоратот до седиштето на Републичката изборна комисија. Носеа кутии со потписи и предадоа изборна листа на студентското движење „Студентска листа – Студентите победуваат“. Шетањето траеше околу триесет минути и беше наречено „Шетање на победата“.

На чело на колоната имаше голема група мотоциклисти. Над луѓето се вееја државни знамиња со пораката „Слободата нема цена“, факултетски и средношколски знамиња, транспаренти на граѓански групи. Студентите носеа и реплика на скулптурата „Победник“ на Иван Мештровиќ – симболот на Белград што стои на Калемегдан.

Потписите што мораа да се чекаат во ред

Собирањето потписи не помина мазно. И покрај ветувањата, организаторите не успеале да обезбедат доволно нотари за заверка, па илјадници луѓе низ Белград и низ цела Србија чекаа во редови преку викендот само за да им биде заверен потписот. Административна пречка која секој на Балканот ја препознава без објаснување.

Одговорот од врвот

Александар Вучиќ реагираше со видео на Инстаграм. Ја нарече студентската листа „безимена“, без „програми и планови“ и „листа од која сите се срамат“. Праша зошто илјадници потпишале без да знаат кои се кандидатите и каква е платформата.

Само што листата не е безимена. Таа содржи 250 кандидати за пратеници – професори, лекари, уметници, актери, спортисти, активисти и претприемачи од разни делови на Србија, избрани преку повеќе од една година факултетски собранија, блокади и колективно одлучување. Може да ти се допаѓа или не, но „безимена“ е најслабиот приговор што му беше на располагање.

Изборната комисија досега потврди листа на Српската напредна партија со коалициските партнери, предводена од Вучиќ, и листа на Социјалистичката партија на Србија под Ивица Дачиќ. Истиот Вучиќ најави дека на 27 септември ќе поднесе оставка на функцијата претседател и ќе води кампања како обичен граѓанин – купил камион, возило и камп-приколка за да обиколи и оддалечени места и градови, со три-четири големи митинзи и завршница во Ниш.

Претседател што поднесува оставка за да може да води кампања. Дали кај нас би реагирале исто на таков потег?