Фирмата „Линк Медиа Плус ДООЕЛ“ од Скопје е избрана да го изведе новогодишното украсување на главниот град, откако како единствен понудувач го доби тендерот распишан од Град Скопје. Договорот е вреден 3.260.000 денари, а пред потпишување компанијата треба да достави банкарска гаранција за извршување.

Истата фирма годинава ги доби и тендерите за украсување во Општина Центар и Општина Штип, а според податоците од системот за јавни набавки, „Линк Медиа Плус“ претходно работела и на проекти за одржување службени возила, миење улици, набавка на корпи за отпадоци, како и празнични декорации во повеќе општини и трговски центри.

Според тендерската документација, оваа година во централниот дел на градот ќе бидат поставени:
– три светлосни фигури „подарок“ со должина од најмалку 4 и висина од 3 метри,
– новогодишна елка висока најмалку 13 метри,
– 3Д фигура „мече“ висока 4 метри,
– алуминиумски светлосни ѕвезди во две големини,
– 3Д рамка за фотографирање во форма на Дедо Мраз,
– „ѕвездено небо“ со најмалку 800 m² лед-мразулци,
– светлосна декорација на 25 канделабри.

Празнично ќе бидат украсени и улиците „Даме Груев“, „Димитрија Чуповски“, „11 Октомври“, булеварите „ВМРО“, „Гоце Делчев“, „Партизански Одреди“, како и улицата „Филип Втори Македонски“. Пред зградата на Владата ќе бидат поставени 40 светлосни елементи.

Проектот ќе биде целосно изведен и демонтиран од страна на „Линк Медиа Плус“ по завршување на празничниот период. Градот Скопје дополнително ќе соопшти кога започнува поставувањето на украсите.