Антициклон носи суви денови, а викендот мраз и слана: утрата под нулата на 7 и 8 ноември

Врнежливата епизода си замина со последна бројка за паметење. Во 24 часа до 7 часот во вторник, во Демир Капија наврнале 50 литри дожд на квадратен метар, во Гевгелија 45, на Попова Шапка 43, во Крушево 38, а во Струмица 34. Скопје-Петровец и Битола добија по 20 литри. Попова Шапка утрото се разбуди на 1 степен.

Од среда, 4 ноември, сликата се менува. Метеорологот Славчо Попоски објаснува дека над Македонија се воспоставува поле со висок воздушен притисок, антициклон, кој во наредните денови ќе донесе стабилно и суво време без врнежи, со повремени сончеви периоди и слаб до умерен ветер од север и североисток. Наутро по котлините и речните долини ќе има магла.

Во Скопје утринските температури ќе бидат меѓу 8 и 9 степени, а дневните ќе стигнуваат до 13-14. Во остатокот од земјата минималните ќе се движат од 3 до 11 степени, максималните од 9 до 15.

Вистинската промена доаѓа за викендот. „Намалување на облачноста ќе имаме за време на викендот, сабота и недела, 7 и 8 ноември, кога температурите наутро ќе бидат значително пониски“, вели Попоски, со минимални температури што на повисоките места и на планините ќе се спуштат под нулата, со мраз и слана. Значи, време е за зимските гуми и за проверка на греењето. А антициклон, магла по котлините и мирен воздух се комбинација што скопјани ја паметат и од зимите со загаден воздух. Ќе дишеме ли и оваа есен полесно, или ќе гледаме во апликациите за квалитет на воздухот?