Договорот од 10 милиони евра за луна-паркот раскинат поради пресуда за стариот договор: Скопје без забавен парк веќе една деценија

Скопје е без луна-парк веќе една деценија. Тоа не го пишуваме ние – тоа го признава самиот Град Скопје во соопштението со кое се обидува да објасни зошто е раскинат договорот од 10 милиони евра со фирмата „Мастеф“ за проект, набавка и монтажа на 16 реквизити за новиот забавен парк. Договорот е потпишан во мај годинава, а спогодбено е раскинат во август.

Објаснувањето на Градот гласи вака: по раскинувањето на претходниот договор за реквизити, склучен во времето на градоначалникот Коце Трајановски, фирмата повела судска постапка, а судската одлука во нејзина корист, со која Градот е обврзан да ги плати реквизитите, стигнала откако веќе бил склучен новиот договор. Бидејќи новата набавка ги опфаќала и реквизитите од претходниот договор, договорот бил раскинат за да се избегне двојна набавка.

Седум реквизити од времето на Трајановски

Податоците од Бирото за јавни набавки покажуваат каде почнува приказната. Во август 2016 година Градот склучил договор со „Жикол“ за изградба на забавен парк вреден над 1,6 милиони евра. Неколку месеци подоцна, на крајот на вториот мандат на Трајановски, следувале седум договори за набавка на реквизити во вкупна вредност од околу 2,1 милион евра – два со „Ивама Трејд“ за околу 211.000 евра и пет со „Боминг“ за околу 1,9 милиони евра.

Тука сликата станува заматена. Во регистарот на судски пресуди постои пресуда на Врховниот суд од март годинава – пред потпишувањето на договорот со „Мастеф“ – во спорот меѓу „Боминг“ и Градот. Основниот граѓански суд во 2022 година делумно ѝ дал право на фирмата, која тврдела дека Градот неосновано активирал банкарски гаранции. Но Апелациониот суд во 2024 година ја преиначил пресудата во корист на Градот, а Врховниот суд ја одбил ревизијата на „Боминг“ како неоснована, во спор вреден околу 520.000 евра.

Значи, барем во овој спор, Градот не изгубил. Тогаш која е судската одлука што го натерала да раскине договор од 10 милиони евра? И ако новиот тендер ги опфаќал реквизитите од стариот договор, зошто никој тоа не го забележал пред потпишувањето во мај?

Рокот останува – барем на хартија

Градот тврди дека ништо не се менува: за еден месец ќе почне монтажата на седумте реквизити од стариот договор, паралелно со уредувањето на просторот, а со нов тендер ќе се набават ролеркостер и панорамско тркало. Новиот договор, велат, ќе биде помал од 10 милиони евра, а луна-паркот ќе биде готов до крајот на 2027 година, како што е ветено во програмата на градоначалникот Орце Ѓорѓиевски.

Скопјаните на сето ова одговараат со горчлива шега. „Дете бев кога престана да работи. Дете имам, не работи. Ама за внукот, здравје Боже, ќе работи“, вели еден граѓанин. Друга скопјанка се надева „да не биде како патот за Охрид, децении се стори“. По десет години чекање и реквизити заглавени во магацин, тешко е да се тврди дека претеруваат.