Битолчани за буџетот за 2027: надвозник кај училиште, вода за Нижеполе и дневен центар за деца со аутизам

Надвозник кај ОУ „Коле Канински“, асфалтирани улици, водоснабдување и пречистителна станица за Нижеполе, спортски терени за студентите и простор за дневен центар за деца со аутистичен спектар. Ова се дел од предлозите што битолчани ги изнесоа на првата сесија од Буџетскиот форум за општинскиот буџет за 2027 година.

Општина Битола петта година по ред организира форум на кој граѓаните директно ги посочуваат приоритетите. „Форумот не е обична јавна расправа, туку место каде граѓаните активно учествуваат во предлагањето решенија и утврдувањето приоритети“, рече градоначалникот Тони Коњановски, додавајќи дека буџетот не е само финансиски документ, туку одраз на потребите на граѓаните.

Списокот покажува и што му недостасува на градот. Граѓаните бараат објект за државното музичко училиште, средно уметничко училиште, професионален фолклорен ансамбл и Битолска градска куќа. Се разговараше и за спортската сала во Долно Оризари, за пливачкиот базен во ОУ „Даме Груев“ и за реновирањето на училиштето во Буковски Ливади.

Форумот е добра практика – буџет за кој граѓаните кажале што им треба е подобар од буџет напишан зад затворени врати. Но пет години стаж носат и право на прашање: колку од предлозите од минатите форуми навистина се изградени? Ако општината сака форумот да биде повеќе од ритуал, следната сесија може да почне токму со таа листа.