Седум години од свадбата на Рафа Надал и Мери Перељо: два фустани од Rosa Clará, Хуан Карлос и Софија меѓу гостите и телефони предадени на обезбедувањето

На 19 октомври 2019 година Рафаел Надал и Мери Перељо си рекоа „да“ – поточно „sí, vull“, на мајорчански. Церемонијата беше во Са Форталеса, замок од 17 век во Пољенса, на северот на Мајорка, островот на кој и двајцата пораснале и каде што почнала нивната приказна. Од тој ден поминаа точно седум години.

Приказната е тинејџерска. Таа имала 17 години, тој 19 и тукушто почнувал во спортот што подоцна ќе го направи легенда. Мери одела во исто училиште со Марибел, сестрата на Рафа. Четиринаесет години подоцна одлучиле да се венчаат – и тоа дома, а не на некоја егзотична плажа за списанијата.

Гостите и правилото без телефони

На свадбата имаше околу 250 роднини и пријатели. Меѓу нив беа Хуан Карлос и Софија, поранешниот крал и поранешната кралица на Шпанија, Карлос Моја и Каролина Сересуела, Фелисијано Лопес и Сандра Гаго, Давид Ферер и Марта Торнел. Двојката сакаше строга приватност, па гостите на влезот ги предаваа мобилните телефони на обезбедувањето. Деталите излегоа во јавноста дури подоцна.

Првиот фустан: чипка, арт деко и шлеп што се вади

Мери носеше два фустани, двата изработени по мерка во ателјето на Rosa Clará. За церемонијата: романтичен и префинет модел со квадратно деколте и долги ракави. Горниот дел беше од француска чипка инспирирана од арт деко, со геометриски и цветни мотиви и рачен вез со ситни апликации од камчиња. Здолништето беше од природен свилен креп, ѕвонест крој, со отстранлив горен дел со шлеп, за изгледот да се прилагоди на различните делови од денот. Превезот беше од природен свилен тил, а косата делумно пуштена, со природни бранови и дискретно подигнат горен дел.

Вториот фустан: за танцување

За забавата се пресоблече во полесен модел од француска шантиј чипка: деколте врзано околу вратот, силуета на сирена и длабоко отворен грб. Споредбите со вториот фустан на Меган Маркл од свадбата со принцот Хари беа неизбежни. Едно беше јасно – овој фустан беше направен за подиумот за танц, а не за фотографите.

Мајорчански, регетон и пакет против мамурлак

Венчавката ја водеше свештеникот Бартомеу Катала, почна околу еден час подоцна од планираното, а голем дел од литургијата беше на мајорчански. Благодарение на убавото време, церемонијата, коктелот и ручекот беа на отворено. Менито го потпиша готвачот Санти Таура: канелони со месо и бешамел со тартуфи, лаврак печен во хартија и лимонов десерт. Ноќната закуска ја подготви Мака де Кастро. По банкетот гостите играа на регетон до раните утрински часови, а на заминување секој доби персонализиран пакет против мамурлак, со имињата на младенците и упатство за следниот ден.

Балканската свадба без телефони на маса звучи речиси како научна фантастика. Надал покажа дека може – доволно е обезбедувањето да биде построго од кумот.