Вучиќ ѝ рече на Собчак дека Путин не блефира со нуклеарното оружје, а за удар врз Европа: „Мислам дека ќе. Нема да го направи“

Александар Вучиќ, кој сега е кандидат за премиер на Србија, во интервју за руската новинарка Ксенија Собчак порача дека Владимир Путин „воопшто не блефира“. Ако Русија биде директно нападната – од САД, од Европа или од Велика Британија – нуклеарниот одговор, според Вучиќ, ќе дојде во истиот момент. Западните лидери, вели, прават огромна грешка ако мислат поинаку.

„Кога почнаа да зборуваат како Путин блефира за употребата на нуклеарното оружје, на сите на Западот им реков: Путин воопшто не блефира. Тој сигурно не сака да го употреби така, без причина. Никој не е луд. Но ако дојде до директен напад однадвор, од Америка, Европа или Британија, од кого сакате, ќе одговори со нуклеарно оружје во истиот момент“, изјави Вучиќ. Според него, западните соговорници повеќепати ги отфрлале неговите предупредувања со одговорот: „Не, не, тој блефира.“

Вучиќ прецизираше дека зборува за ситуација во која Русија е директно нападната и мора да ја брани својата територија, а не за произволна употреба на нуклеарното оружје. Додаде дека истото предупредување го повторува и денес, бидејќи многумина на Западот веруваат дека Алијансата е посилна од Русија и дека до тоа никогаш нема да дојде. „Ако навистина мислите дека нема да го употреби под никакви услови, тоа е огромна грешка“, рече тој.

Одговор што си противречи

Потоа Собчак го отвори најконкретното прашање. Таа ја спомена тезата на рускиот политиколог Сергеј Караганов: Русија да изврши превентивен нуклеарен удар врз европски фабрики што произведуваат оружје за Украина, без опасност од американски нуклеарен одговор – и така брзо да ја заврши војната. Вучиќ ја отфрли таа можност, вака: „Не мислам дека Путин ќе го направи тоа. Зошто? Не знам зошто… Мислам дека ќе. Нема да го направи. Затоа што Путин сака да покаже дека тоа ќе го стори само во исклучителна ситуација.“

Човекот кој тврди дека ги разбира намерите на Путин подобро од западните лидери, на прашањето за нуклеарен удар врз Европа одговори со „мислам дека ќе“ и „нема“ во две последователни реченици. Неговиот заклучок, сепак, гласи дека Путин нуклеарното оружје не го гледа како оружје за победа однапред, туку само како одговор во тешка ситуација – „последица од нечии постапки“.

Србија е кандидат за членство во Европската унија, а нејзиниот најмоќен политичар, сега и кандидат за премиер, објаснува нуклеарна доктрина во интервју за руска новинарка. Дали ова е порака до Брисел, до Москва или до гласачите дома? Можеби до сите одеднаш – вештина што на Балканот многу добро ја познаваме.