Бугарија нема да учествува во новите 70 милијарди евра за Украина: Софија чекор поблиску до Будимпешта?

Бугарија нема да учествува во новата финансиска помош на ЕУ за Украина. Тоа го соопшти премиерот Румен Радев, и тоа без многу дипломатско завиткување: „Како изгледа тоа во однос на сè што се случува во Европа? Бугарија на никаков начин не може да учествува во тие 70 милијарди“, им рекол Радев на новинарите во градчето Тврдица.

Бројката на која реагира е свежа. На неодамнешниот европски самит украинскиот претседател Володимир Зеленски побарал од ЕУ дополнителни 70 милијарди евра за одбрана од руската инвазија во следната година.

Радев потсети дека ЕУ лани ѝ одобри на Украина 90 милијарди евра за трошоците во 2026 и 2027 година. Тогаш три членки – Унгарија, Чешка и Словачка – издејствуваа да не учествуваат во заемот. Бугарија тогаш учествуваше. Сега менува страна.

Образложението ќе му звучи познато на секој што ги слушал Будимпешта и Братислава: војната ги исцрпува европските економии, создава социјални тензии и политичка нестабилност, па треба да заврши што поскоро. „Резултатот нема да се постигне со воени средства“, рече Радев – човек кој беше претседател на државата од 2017 година до оставката во јануари 2026, а сега е премиер.

За Балканот ова не е мала вест. Бугарија е членка на ЕУ и НАТО, црноморска држава на источното крило на Алијансата, и досега ја следеше европската линија за Украина. Кога и Софија почнува да брои колку чини солидарноста, прашањето е колку уште ќе издржи единството на Унијата – и кој ќе биде следниот што ќе каже „не можеме“.

За Скопје, чиј европски пат со години го кочи токму Софија во име на европските вредности, сликата е барем поучна. Европските вредности, излегува, важат додека не дојде сметката.