Грчките земјоделци и вечерва продолжуваат со блокадите на граничните премини кон Македонија. Според најавите, граничниот премин „Евзони–Богородица“ ќе биде целосно затворен за сообраќај од 19 до 23 часот по македонско време.

Како што јавува грчката новинска агенција АНА-МПА, за вечерва е планирана и блокада на граничниот премин Ники (Меџитлија), и тоа во периодот од 20 часот до полноќ. Оваа блокада, како и во изминатите денови, ќе се однесува исклучиво на товарните возила, додека патничкиот сообраќај ќе се одвива со повремени ограничувања.

Протестите на грчките земјоделци започнаа на 30 ноември, кога тие изразија незадоволство од владините политики и високите трошоци за производство. Освен граничните премини, земјоделците изминатиот период блокираа и железнички станици, автопатишта, пристаништа, аеродроми и други јавни објекти низ Грција.

Надлежните апелираат до граѓаните и превозниците навремено да се информираат и да ги планираат патувањата, поради можни застои и долги чекања на границите.