Итно повлечена бебешка формула „Аптамил АР1“ поради опасна бактерија

Хрватскиот државен инспекторат донесе итна одлука за повлекување од пазарот на бебешката формула „Аптамил АР1“ (Aptamil AR1), поради зголемено присуство на бактеријата Bacillus cereus, која може да претставува ризик по здравјето на доенчињата.

Како што соопшти Хрватската агенција за земјоделство и храна (HAPIH), одлуката е донесена врз основа на микробиолошките критериуми за безбедност на храната и важечките регулативи на Европската унија. Информацијата ја пренесоа и хрватските медиуми, меѓу кои и Index.hr.

Повлекувањето се однесува исклучиво на пакување од 400 грама со следните податоци:
– рок на траење: 17.05.2026 година
– ЛОТ број: 111444865
– производител: Nutricia Export BV, Холандија

Надлежните институции нагласуваат дека производот не е во согласност со регулативите на Европскиот парламент за безбедност на храна. Дистрибутер на производот за хрватскиот пазар е компанијата „AWT International d.o.o.“.

Граѓаните кои го купиле наведениот производ се повикуваат да не го користат и да го вратат на местото на купување, додека инспекциските служби продолжуваат со дополнителни контроли.