Ѓорѓиевски по една година: обврските намалени за 3,68 милијарди денари, а 100-те нови автобуси сè уште се најава

Речиси една година откако влезе во градоначалничкиот кабинет, Орце Ѓорѓиевски излезе со отчет и со гаранција. „Јас можам да гарантирам дека до крајот на мојот мандат, сè од ова ќе биде реализирано“, изјави тој, покажувајќи ја својата предизборна програма. Додаде и дека нешто ветено за првата година може да стигне во втората.

Најсилниот дел од отчетот се бројките за парите. Обврските на Град Скопје се намалени за 1,065 милијарди денари, а кај шест јавни претпријатија за уште 2,615 милијарди, вкупно околу 3,68 милијарди денари, односно приближно 60 милиони евра. Најмногу кај „Водовод и канализација“ (1,66 милијарди денари), потоа кај ЈСП „Скопје“ (634 милиони). Раздолжени се и Музејот на град Скопје и КИЦ.

Бројките звучат добро, но не кажуваат сè. Колку од тоа е навистина исплатено, колку е репрограмирано или сметководствено усогласено и колку нови обврски се создадени во меѓувреме? Без тие одговори, отчетот е половина слика.

Кај инфраструктурата листата е долга: завршени реконструкции на улиците „Перо Наков“ и „Фрањо Клуз“, надвозникот Естакада, клучката кај Момин Поток во завршна фаза, мостот меѓу „Љубљанска“ и „Скупи“ најавен за крајот на годината, булеварот „Борис Трајковски“ пред крај. Но голем дел од овие проекти се започнати во претходните мандати. Довршувањето на заглавени проекти е работа, но не е визија.

А визијата е токму она што се чека. Стратегијата „Скопје 2025-2045“ требаше да ја постави меѓународен борд, а во јавноста нема информации дека таков е формиран. Ѓорѓиевски вели дека борд постои и дека можеби е негова грешка што не го објавил, но не можеше да се сети на имињата на странските експерти. Новиот ГУП, кој доцни четири години, сега е најавен за 2028 година.

За скопјаните што чекаат на постојка, најважната бројка е друга: 100 нови еколошки автобуси. Тие се сè уште најава, исто како брзиот автобуски превоз и градскиот воз. Ако по една година јавниот превоз е таму каде што беше, колку гаранции ќе му требаат на градот за автобусот да стигне навреме?