Премиерот на митинг им суди на судиите: Мицкоски од Брвеница тврди дека одлуката за модуларната во Тетово ја определила блискоста со ДУИ

Христијан Мицкоски го заврши митингот во Брвеница со порака „Една Брвеница за сите“ и со реченици за институции што постојат за да му служат на граѓанинот. Во тој говор, премиерот на државата им порача на судиите на Врховниот суд дека знае зошто пресудиле како што пресудиле.

„Сетете се на модуларната болница, сетете се како луѓе живи гореа и сетете се на одлуката на Врховниот суд, видете ги судиите коишто ја донесоа таа одлука на 22 октомври, овој месец, кога ги ослободија тие луѓе. Истите тие луѓе. Зашто? Затоа што се блиски до раководството на ДУИ“, рече Мицкоски. Сакаме ли таква правда, праша од бината.

Прашањето за пожарот во модуларната болница во Тетово е легитимно и тешко, а семејствата на жртвите имаат право да бараат одговор. Но премиер што на партиски митинг, два дена пред изборите, тврди дека судии решавале според партиски блискости, е нешто друго. Ако за ова постојат докази, зошто се кажуваат на митинг, а не се пред надлежните органи? А ако не постојат, што останува од поделбата на власта?

Остатокот од говорот беше предвидлив. Тој ѝ замери на коалицијата предводена од ДУИ дека за две децении не донела резултати, ги прозва оние што „продаваат етнички магли“ и порача дека патриотизмот се докажува со дела. „Да ги поразиме овие политичари на минатиот век“, рече на крајот, повикувајќи ги граѓаните да го заокружат бројот 1 за Стојанчо Радичевски.

Ставот на Мицкоски е дека ВМРО-ДПМНЕ им се обраќа на сите, а противниците создаваат етничка поделба. Зборуваше за општина со Македонци и Албанци, христијани и муслимани, што ќе живеат заедно и откако партиите ќе си заминат. Тоа е точно. Истовремено, премиерот лично ја заврши кампањата во една општина, а бројките ја откриваат тежината: во првиот круг партијата имала речиси 3.000 гласа, а целта е над 4.000.

Изборите во недела ќе покажат кој ги има гласовите. Прашањето што останува и по пребројувањето е друго: кога премиерот одлучува кој судија е чиј, кој ќе ја брани независноста на судот од премиерот?