Вучиќ предложен за шеф на СНС по поразот: Партијата што 14 години ја водеше Србија можеби нема да има ни кандидат за претседател

Шест дена откако ги загуби изборите, Александар Вучиќ се враќа таму од каде што тргна. Главниот одбор на Српската напредна странка на 31 октомври со аплауз го прифати предлогот на Милош Вучевиќ, кој партијата ја води од 2023 година, Вучиќ повторно да застане на нејзино чело. Формално ќе се одлучува на вонредно собрание на 13 декември. Вучевиќ ја претстави СНС како „единствена политичка партија што ја преживеа обоената револуција“. Студентската листа ја победи со апсолутно мнозинство и разлика од околу 600.000 гласови, ама преживувањето очигледно е новата мерка за успех.

Вучиќ на 27 септември си поднесе оставка како претседател на Србија за да ја поведе листата како кандидат за премиер. Денес не е ниту едното ниту другото. Му остана партијата.

Бахатост, па талог и тиња

Пред одборниците, според Вучевиќ 657 на број, Вучиќ ја сведе иднината на три збора: одговорност, промени и борба. Кажа и реченица што малкумина очекуваа да ја слушнат од него: партијата мора да ја смени „бахатоста и ароганцијата“, затоа што „додека тоа не го промениме, засекогаш ќе бидеме казнети од граѓаните на Србија“. Според него, поразот е дел од животот, а борбата овој пат не се водела само однатре, туку и однадвор, „со огромни пари“. Кои пари и од кого, не кажа.

Самокритиката не доживеа крај на говорот. За составот на новата влада рече дека таму се луѓе од дното. „Доаѓаат моменти во историјата кога талогот и тињата испливуваат на површина. Но талогот и тињата по извесно време се враќаат на дното“, порача тој, а за Студентската листа додаде дека таму „нема никакви деца“, туку „главно старци“. Така се бори против ароганцијата човек што граѓаните штотуку го казнија.

Косово како партиска задача

За регионот најважниот дел беше оној што ќе помине најтивко. „Ќе мораме да се бориме и да му помагаме на нашиот народ на Косово и Метохија многу повеќе отколку што сме го правеле досега, затоа што досега тоа го правеше државата“, рече Вучиќ и вети дека партијата ќе го заштити народот таму. Човекот што со години ја водеше политиката кон Приштина од највисоката државна функција, сега Косово го зема како задача на опозицијата.

Истовремено најави промена на надворешнополитичкиот курс на партијата, чии детали засега не се познати, а за новата власт порача: „Кога ќе ги прашате за санкциите кон Русија, едните велат да, другите не“. Србија сè уште нема ново собрание ни нова влада, а Вучиќ веќе ја поставува сцената: ако нешто тргне наопаку со Косово, виновникот е познат. Дали за него Косово сега е национално прашање, или најсигурниот начин партијата да остане на нозе?

Избори без кандидат

Календарот е интересен. Собранието на СНС е на 13 декември, а претседателските избори, што ги отвори самиот Вучиќ со својата оставка, мора да се одржат до 27 декември. Сега тој вели дека партијата можеби нема да излезе. „Не реков дека нема, но постои опција да не излеземе, затоа што во овие услови не е реално“, рече, а противниците ги испрати да си трчаат сами: „Нека најдат два-три сателита што ќе трчаат со нив“. Партијата што 14 години ја водеше Србија значи размислува да не истакне кандидат за највисоката функција во државата, а вршителка на должноста претседателка до изборите е нејзината Ана Брнабиќ.

Говорот заврши со порака што не бара превод: „Одиме да ги победиме, и тоа многу побрзо отколку што очекувате вие и отколку што очекуваат тие“. Нова влада уште нема, а Вучиќ веќе го брои нејзиниот пад. Балканот добро ги познава лидерите што поразот го сметаат за пауза. Прашањето е дали српските институции овој пат ќе го издржат тоа подобро од него.