Четири гиганти најавија над 740 милијарди долари вложувања годинава, а Вол Стрит почна да прашува дали парите ќе се вратат: Alphabet за еден ден изгуби 500 милијарди долари вредност

Alphabet, Amazon, Meta и Microsoft во последните две недели најавија над 740 милијарди долари (околу 662 милијарди евра) капитални вложувања годинава. Вол Стрит тоа го чита едноставно: дата центри и чипови за вештачка интелигенција. Сè до неодамна толкав износ носеше аплауз. Овојпат донесе продажба.

Во петок Nasdaq падна 2,9 проценти, Nvidia изгуби 4, Broadcom над 5, а Qualcomm цели 11 проценти. Ден порано Alphabet потона 12 проценти, најлошиот ден во својата историја, и изгуби 500 милијарди долари (околу 447 милијарди евра) пазарна вредност. За размер: тоа е над 26 пати повеќе од целиот БДП на Македонија за 2025 година, кој според Светска банка е околу 19,1 милијарди долари. Во петок акциите на Alphabet паднаа уште.

Најјасна слика на проблемот дава токму Google. Матичната компанија во третиот квартал потрошила 9,1 милијарди долари повеќе готовина отколку што донела, втор квартал по ред во минус, додека вложувањата за три месеци стигнале до 51,4 милијарди. За годинава очекува до 205 милијарди долари, а за 2027 уште повеќе. Во меѓувреме AI Mode, четботот вграден во пребарувачот, има огромен успех и токму затоа го гризе бизнисот што го храни: рекламите во пребарувањето, околу половина од приходите на компанијата, пораснале 12 проценти, најслабо темпо во последните пет квартали. Google плаќа милијарди за производ што може да ја заколе кокошката што му носи златни јајца.

Ни другите не стојат многу подобро. Amazon за последните 12 месеци е 42,4 милијарди долари во минус по готовина, наспроти 14,8 милијарди во плус година порано, и покрај тоа што облакот AWS порасна 39 проценти. Акциите му паднаа 7 проценти. Meta е 2,1 милијарда во минус за кварталот, најавува до 145 милијарди вложувања, а Цукерберг сам признава дека новиот бесплатен агент Muse троши огромна пресметковна моќ. Рекламите ѝ пораснаа 26 проценти, но ни тоа не ја спаси од пад од 10 проценти. Единствен исклучок е Microsoft, со 18,6 милијарди во плус. Вложил 45,2 наместо најавените 50 милијарди, вели дека тоа не е намерно повлекување туку доцнење кај добавувачите, а акциите на помалите фирми што изнајмуваат пресметковна моќ потонаа.

Побарувачката не е проблемот: Google, Amazon и Microsoft и натаму растат во облакот. Проблем е цената за да се стигне до неа, и од каде доаѓаат парите. Не само од профитот. Според S&P Global Market Intelligence, Microsoft, Alphabet, Amazon, Meta и Oracle годинава собрале 326 милијарди долари (околу 292 милијарди евра) нов долг, трипати повеќе отколку лани. Трката што ја претставуваа како доказ за сила сè повеќе се води на позајмени пари.

Сето ова паѓа точно во неделата кога Anthropic поднесе барање да излезе на берза, а според Financial Times, Blackstone им кажал на инвеститорите дека компанијата можеби нема да добие инвестициски кредитен рејтинг. На Балканот таа логика ја знаеме од власти што градат на долг, а враќањето го оставаат на следните. Разликата е што пазарот не чека избори: казната стигнува за еден ден, како онаа од 500 милијарди долари.