Владата: законот за координација на службите е усогласен со НАТО, но не се применува – затоа го укинуваме

Владата има закон за кој самата вели дека е добар, но не работи – и наместо да го натера да работи, решила да го укине. Предлог-законот за престанување на важењето на Законот за координација на безбедносно-разузнавачката заедница помина на прво читање во собраниската Комисија за одбрана и безбедност, со осум гласа „за“ и два „против“.

Образложението, кое го подготви Министерството за внатрешни работи, е вредно да се прочита двапати. Во него пишува дека законот е „системски правилно поставен и концепциски усогласен“ со стандардите на ЕУ и НАТО, но дека неговата примена е ограничена поради „институционална недоверба, претесен опфат и недостиг на оперативен капацитет“ на безбедносно-разузнавачката заедница. Со други зборови: правилата се добри, службите не соработуваат, па да ги избришеме правилата.

Законот го воспоставува Советот за координација меѓу Агенцијата за национална безбедност, Агенцијата за разузнавање, Военото разузнавање, Финансиската полиција и Бирото за јавна безбедност. Пратеникот на СДСМ Оливер Спасовски праша зошто тој Совет немал ниту еден состанок, иако според законот треба да заседава најмалку еднаш на три месеци. Одговор на тоа прашање засега нема.

„Неспособни“ – но без оставки

Пратеничката Славјанка Петровска, исто така од СДСМ, ја сврте логиката на Владата против неа. Ако официјалниот документ вели дека службите немаат оперативен капацитет и меѓусебна доверба, тогаш, според неа, по усвојувањето треба да следат оставки – од министерот за внатрешни работи и од директорите на АНБ и Агенцијата за разузнавање. „Не постои во нашата поблиска и подалечна историја која било влада што ќе даде карактеристика за безбедносно-разузнавачките служби дека се неспособни“, рече таа.

Петровска потсети дека слабостите биле констатирани пред една година, а наместо да бидат поправени, сега се предлага укинување. Законот, вели таа, бил клучен во реформите пред влезот во НАТО.

Спојување без карта

Сето ова се случува додека Владата најавува спојување на АНБ и Агенцијата за разузнавање. Опозицијата прашува дали укинувањето на координацијата е првиот чекор кон тоа – а Петровска предупредува дека Владата не понудила јасна слика како ќе изгледа новата поставеност и кој ќе ги надгледува службите. Пратеникот Горан Мисовски праша дали со ова се напуштаат препораките на Прибе и побара став од претседателката Гордана Сиљановска-Давкова.

Македонија добро ја памети аферата со прислушувањето, од која произлегоа и препораките на Прибе. Затоа прашањето не е техничко. Ако службите не сакаат да соработуваат со закон, како ќе соработуваат без него? И кој ќе одговара кога ќе се покаже дека немало никаква координација токму кога била најпотребна?