Грција тоне во корупција, измами и фалсификати во земјоделството

Грција се соочува со еден од најголемите корупциски скандали во земјоделскиот сектор, кој веќе доведе до оставка на четири министри и распуштање на агенцијата задолжена за распределба на ЕУ субвенциите.

Скандалот го откри Канцеларијата на европскиот јавен обвинител (ЕППО), која утврдила:

• дека баратели на субвенции пријавувале лажни податоци за сопственост на земјиште,

• користеле фалсификувани договори за закуп,

• и пријавувале фарми и пасишта на локации каде што никогаш не живееле.

Коренот на проблемот лежи во непостоечкиот сеопфатен земјишен регистар, иако тој беше услов на ЕУ уште од првиот спасувачки пакет во 2009 година, а подоцна и предуслов за пристап до фондовите за закрепнување по пандемијата.

Европската комисија во јуни донесе одлука со која ја исклучи Атина од финансирање од 392,2 милиони евра од Заедничката земјоделска политика, поради лошо управување и слаб надзор.

Ова ја отвори „Пандорината кутија“: инспекции започнаа низ цела Грција. Но, земјоделските здруженија предупредуваат дека со тоа сите се етикетирани исто – и оние што заработиле милиони, и оние со ситни административни грешки.

„Кога сите се виновни, никој не е“, изјави Власис Циогас од земјоделската задруга „Пасиу Климентиу“.

 Во меѓувреме, грчките власти преговараат со Брисел за брзо решение. Владин службеник за Еурактив изјави:
„Чесните земјоделци ја плаќаат цената со доцнење на исплатите од ЕУ. Системот мора да се поправи, за да не се изгубат европски средства.“