Албанска актерка ја тужи владата на Рама: Без дозвола го користеле нејзиниот лик за AI министерката Диела

Албанската актерка Анила Биша поднесе тужба против владата на премиерот Еди Рама за неовластено користење на нејзиното лице и глас при креирањето на виртуелната министерка „Диела” — првиот виртуелен државен функционер генериран со вештачка интелигенција во светот.

„Диела”, чие име значи „сонце” на албански, беше претставена минатиот септември на почетокот на четвртиот мандат на Рама, со задача да го надгледува доделувањето на владините договори за јавни набавки. Целта, според владата, е намалување на корупцијата, непотизмот и конфликтот на интереси.

Биша тврди дека никогаш не дала согласност нејзиниот лик да биде користен на тој начин. Таа минатата година дозволила нејзиниот лик да се користи за дигитален асистент на државниот портал е-Албанија, но не и како виртуелен политичар.

„Прво бев изненадена, се насмевнав и реков дека мора да е шега. Сега луѓето ме викаат Диела и ме сметаат за само уште една министерка на владата”, изјави актерката, додавајќи дека ситуацијата предизвикала вознемирување на интернет и несакано внимание.

Тужбата е поднесена против Советот на министри, државната компанија Апел, Националната информативна агенција и самиот премиер Рама пред Управниот суд во Тирана. Нејзиниот адвокат бара отштета од 1 милион евра.

Од владата ги отфрлија обвиненијата. Директорката на Агенцијата за медиуми и информации изјави: „Тужбата е неоснована, но го поздравуваме решавањето на ова еднаш засекогаш на суд”.