Хрватска ќе продолжи да ја поддржува Македонија на патот кон членство во Европската унија, изјави хрватскиот премиер Андреј Пленковиќ по средбата со премиерот Христијан Мицкоски во Брисел.

„Задоволен сум што се сретнав со премиерот на Северна Македонија во Брисел. Хрватска ќе продолжи да ја поддржува Северна Македонија на нејзиниот пат кон ЕУ”, напиша Пленковиќ на својот профил на X.

Средбата се одржа на маргините на прославата на 50-годишнината од основањето на Европската народна партија, каде ќе се одржи и самит на лидери. Мицкоски е во Брисел со делегација на ВМРО-ДПМНЕ до 20 март.

На средбата беа разменети ставови за актуелните глобални случувања, геополитичките предизвици, безбедноста на енергетското снабдување во Југоисточна Европа и мерките на двете влади за справување со растечките цени на енергијата.

Мицкоски нагласи дека разговорите ги опфатија „актуелните европски предизвици, регионалната соработка и европската перспектива” со акцент на зајакнување на билатералните односи.