СДСМ тврди дека стравот „му влегол длабоко во коските” на Мицкоски. Мицкоски одговара дека „има чувство” дека наскоро ќе се гонат поранешни премиери на СДСМ и нивните блиски. Два „чувства” на маса, ниедна конкретна пресуда.

СДСМ го обвинува премиерот за деловни аранжмани со Орбан, злоупотреба на државни средства преку заеми, медиуми, телекомуникации и инфраструктурни проекти, и можно перење пари. Тврдат дека европски обвинители истражуваат врски Орбан-Мицкоски-Вучиќ и дека граѓаните наскоро ќе слушнат „шокантни детали.”

Мицкоски, од другата страна, очекува СДСМ да го повика Васко Ковачевски да се врати и да се соочи со правдата. Реторика позната до болка: секоја власт ветува гонење на претходната, секоја опозиција ветува разоткривање на актуелната.

Deutsche Welle ја опиша ситуацијата како „заострена реторика меѓу власта и опозицијата околу бегалецот Груевски.” Но вистинското прашање е: дали нешто од ова ќе стигне до судница, или е само предизборно загревање за следниот циклус? Македонските граѓани го слушнале овој филм толку пати што можат да го рецитираат напамет.