Во Карпош две детски игралишта се во лоша состојба од сосема различни причини, но последицата е иста: децата треба да внимаваат повеќе од возрасните што требаше да ги одржуваат.

Во Тафталиџе, на инклузивното детско игралиште кај Халк банка, пред Пожарната станица, граѓаните се жалат дека реквизитите се расклатени и дека се опасни за децата што секојдневно си играат на нив. „Добро е што се поставуваат детски игралишта, но тие треба да се одржуваат. Проблемот е во тоа што не се прави тоа редовно“, велат тие и бараат итна реакција.

Чие е игралиштето? Од Општина Карпош одговараат дека игралиштето го поставил Град Скопје, па одржувањето и реконструкцијата се негова обврска. Општината, велат, испратила допис со ургенција до Градот и очекува „во брзо време надлежните служби да излезат на терен“. Засега, тобоганите во Тафталиџе стојат таму каде што стоеле – расклатени.

Во Карпош 1, пак, проблемот не е во одржувањето, туку во вандалите. Општината соопшти дека на тамошното детско игралиште се оштетени повеќе реквизити и дел од урбаната опрема, и побара полицијата што побргу да ги пронајде сторителите. „За жал, вложувањата во создавање безбедни и уредни простори за најмладите повторно се доведуваат во прашање поради неодговорното однесување и вандалските случаи“, наведоа од Општината.

Карпош вели дека на својата територија има 57 детски игралишта кои редовно ги одржува и ги реконструира по потреба, и апелира до граѓаните одговорно да се однесуваат кон јавниот простор. Апелот е на место – уништено игралиште е кражба од сопствените деца. Но родителот во Тафталиџе не прашува кое ниво на власт го поставило тобоганот. Прашува кој ќе го затегне пред некое дете да падне од него.