Marius Borg është 29 vjeç, ka aktgjykim prej katër vjetësh burg për rreth tridhjetë vepra penale dhe byzylyk elektronik në këmbë. Tani ka edhe një qëllim të ri: punën. Sipas revistës norvegjeze Se og Hør, mbrojtja e tij njoftoi se djali i mbretëreshës Mete-Marit është „i motivuar të fillojë të punojë“ dhe se është fokusuar që „të marrë një ofertë konkrete pune“.

Të kujtojmë për çfarë bëhet fjalë. Mariusi u dënua në fillim të verës, mes tjerash për dy përdhunime dhe për trafik droge. Është nën mbikëqyrje që nga shkurti, ndërsa ndaj një pjese të aktgjykimit paraqiti ankesë. Derisa ankesa është në procedurë, ai nuk rri në qeli, por në rezidencën mbretërore Skaugum - në arrest shtëpiak, me byzylyk në këmbë. Mbrojtja tashmë paralajmëroi se nuk do ta kundërshtojë vazhdimin e atij regjimi për edhe katër javë.

Publiku e pa sërish më 9 shtator, në varrimin e mbretit Harald V në Oslo: me byzylykun, dukshëm të ndryshuar dhe esëll. Ajo paraqitje menjëherë u lexua si fillim i „rehabilitimit“ të tij larg vëmendjes së oborrit. Por në këtë histori radha ka rëndësi. Aktgjykimi është për vepra që ai i ka kryer. „Fillimi i ri“ për momentin është vetëm dëshira e tij.

Mbret i ri, problem i vjetër

Koha është më e keqja e mundshme për kurorën. Norvegjia ka mbret të ri, Hakonin, pas vdekjes së Haraldit V. Mbretëresha Mete-Marit mungon në detyrimet zyrtare derisa shërohet pas transplantimit të mushkërisë, ndërsa princesha Ingrid Aleksandra e mban barrën e protokollit pranë të atit. Monarkia dëshiron të tregojë një ndërrim të qetë brezash, ndërsa titujt sërish i mbledh thjeshtri i mbretit.

Mbeten dy pyetje. Kush do t'ia ofrojë atë „punë konkrete“ - dhe a do të jetë oferta e njëjtë si për çdo të dënuar tjetër, apo si për një anëtar të familjes që jeton në pallat? Ballkani e njeh mirë skenën kur djali i të fuqishmit kërkon shans të dytë. Sa shpesh, nga ana tjetër, ai shans i dytë vjen pas një aktgjykimi prej katër vjetësh, e jo në vend të tij?