Njëzet milionë euro për fazën e parë. Kaq kushton synimi i shtetit që sistemet e veta të shpërndara informatike t'i mbledhë në një vend - në një Qendër Kombëtare të të dhënave me fuqi të instaluar nën një megavat.

Ministri për transformim digjital, Stefan Andonovski, këmbëngul te përmasa: „Nuk flasim për një qendër të dhënash hiper të madhe prej 50 deri 100 megavatësh siç janë qendrat komerciale që ndërtohen në botë, por për një qendër të vogël me më pak se një megavat fuqi të instaluar.” Maksimumi për 20 deri 25 vjet, thotë ai, do të ishte pesë megavat.

Arsyeja pse fare flitet për këtë është më interesante se vetë projekti. Sot sistemet dhe pajisjet shtetërore janë të shpërndara në mbi njëzet qendra më të vogla të dhënash dhe lokacione serverësh. Njëzet vende të veçanta ku shteti paguan rrymë, ftohje, furnizim të pandërprerë me energji, pajisje rrjeti dhe serverësh, siguri fizike e kibernetike, dhe mirëmbajtje.

Andonovski e krahasoi këtë me menaxhimin e njëzet arave të vogla të shpërndara nga Ohri deri në Kumanovë dhe nga Shkupi deri në Strumicë - secila kërkon pajisje, njerëz, logjistikë dhe sigurim.

Financimi vjen përmes Planit për rritje dhe Agjendës reformuese: rreth 30 për qind grant, ndërsa 70 për qind e mbetur shqyrtohet si financim i favorshëm me partnerë ndërkombëtarë. Ndërtimi parashikohet të zgjasë 24 muaj, pas përfundimit të vlerësimeve ekologjike dhe zgjedhjes së lokacionit. Migrimi i sistemeve nuk do të jetë i njëkohshëm - së pari sistemet kritike që tani janë vendosur në kushte të papërshtatshme.

Tani pyetjet të cilave komunikata nuk u përgjigjet. Kush i mbante ato njëzet dhoma serverësh gjithë këto vite dhe sa kushtuan gjithsej? Nëse tani thuhet se një pjesë e sistemeve shtetërore janë në „kushte të papërshtatshme”, kush i çoi atje dhe çfarë ka ndodhur me të dhënat e qytetarëve në ato kushte?

Lokacioni nuk është zgjedhur. Projekti është në fazën e studimit të fizibilitetit. Parametrat teknikë, thotë ministri, do të prezantohen publikisht para vendimeve përfundimtare. Ky premtim ia vlen të mbahet mend - sepse te ne dallimi mes të premtuarës dhe të prezantuarës zakonisht matet në vite.