Kristian Shmit, përfaqësuesi i lartë për Bosnjën dhe Hercegovinën, së shpejti largohet - e Evropa sërish tregoi se nuk pajtohet as për kandidatin e vet. Departamenti i Shtetit i SHBA-së njoftoi se pret që Shmit të largohet në qershor, e pasardhësi i tij ta marrë funksionin deri në fund të muajit.

Problemi është se pasardhës ende nuk ka. Këshilli për zbatimin e paqes (PIK) nuk arriti konsensus në takimin në Sarajevë më 3 e 4 qershor. Favorit ishte kandidati italian Antonio Zanardi Landi, por, siç njoftoi delegacioni amerikan, pikërisht përçarjet evropiane e penguan marrëveshjen. „Presim që Shmit të largohet në qershor dhe përfaqësuesi i ri i lartë ta marrë funksionin deri në fund të muajit", porositën nga Uashingtoni, duke shtuar se janë të zhgënjyer që Evropa nuk arriti ta përmbushë detyrën e vet.

SHBA-të sërish theksuan se mbështesin integritetin territorial të BeH-së dhe Marrëveshjen e Dejtonit. Një takim i ri i PIK-ut është caktuar për fundin e qershorit.

Tridhjetë vjet pas Dejtonit, një vend në Ballkan ende ka një të huaj me kompetenca për të imponuar ligje dhe për të ndryshuar vendime - e ai i huaj tani po ndërrohet sepse ata që e zgjedhin nuk pajtohen mes vete. Për një rajon që prej dekadash pret një „të ardhme evropiane", ky është një mësim i qetë, i pakëndshëm: e njëjta Evropë që kërkon nga Ballkani të jetë koherent dhe funksional, nuk arrin as vetë të pajtohet kur duhet. Kush kujt i jep mësime këtu?