Stafa në gjykatë mohon atë që e pranoi: „Paratë nuk ishin për Ristovin“

Fehmi Stafa, ish-avokat i shtetit, po vuan dënimin me burg pasi pranoi fajin se si avokat mori gjithsej 50.000 euro nga motra e Lupço Pecovit - Djallit, për t'ia dhënë gjyqtarit Gjoko Ristov. Në Gjykatën Penale u soll nga burgu „Shutka“ si dëshmitar i mbrojtjes së Ristovit. Dhe para gjykatës tha të kundërtën e asaj që e kishte pranuar.

„Në asnjë lëndë nuk i kam dhënë para Gjoko Ristovit“, dëshmoi Stafa. Sipas aktakuzës, ai u kap duke marrë 20.000 euro para ndërtesës së motrës së Pecovit. Stafa tani pohon se ajo ishte shpërblim avokatie për përfaqësimin e Pecovit, ndërsa 30.000 eurot shtesë - hua nga vetë Pecovi.

Pse atëherë e pranoi? Sepse, thotë, ishte i bindur se nuk do të dilte i gjallë nga qelia e burgut dhe zgjodhi „të keqen më të vogël“. Pohon se një hetues ishte agresiv ndaj tij dhe se i ishte thënë se do të „shpëtojë“ nëse thotë se paratë ishin për Ristovin. Pretendimet i drejtoi kah prokurorja Iskra Haxhi-Vasileva dhe tha se ka dorëzuar parashtresa në Kontrollin e Brendshëm, në Këshillin e Prokurorëve Publikë dhe në institucione të tjera.

Prokurorja u përgjigj pas dëshmisë. Lënda, tha ajo, nuk mbështetet vetëm në deklarata, por në prova materiale dhe elektronike dhe në komunikim të drejtpërdrejtë mes të përfshirëve, mes tyre Stafa dhe Pecovi. Në shkresa, sipas saj, ka edhe procedura për sjelljen e Stafës në burg, për shkak të të cilave u dënuan disiplinisht nëpunës policorë që i jepnin pajisje telefonike. Për Pecovin tha se është bashkëpunëtor-dëshmitar që „kaloi më butë“, gjë që e quajti taktikë legjitime në luftën kundër krimit të organizuar.

Konteksti është i rëndësishëm. Gjyqtari Ristov gjykohet pasi në shtëpinë familjare në Negotinë u gjetën 350.000 euro para të padeklaruara, të murosura në mur. Pecovi, ndërkaq, para më shumë se një muaji mori dënim me kusht.

Tani kemi një njeri që e pranoi fajin dhe po e vuan dënimin, e si dëshmitar thotë se pranimi i ishte zhvatur. Dy versionet nuk mund të jenë të vërteta njëkohësisht. Nëse nuk është e vërtetë ajo që Stafa tha në gjykatë, gjykata ka dëgjuar dëshmi të pavërtetë. Nëse është e vërtetë, problemi është shumë më i madh se një gjyqtar. Kush do ta përcaktojë këtë - dhe kur?